Pilatsinninnut atatillugu saneqqakkut anarfilerneqarsimavutit.  Saneqqakkut anarfeqarluni ulluinnaat takorlooruminaassinnaapput timillu allanngornerata sungiunniarnera sivisusinnaavoq. 

Naakkut anarfeqarneq

Naakkut anarfik inalukkakkut ammaneruvoq, inalugaq anillatsillugu mersorneqartarluni. Naakkut anarfik itikkut anarfimmut taarsiutaavoq. 

Naakkut anarfik puussialerneqartarpoq amermut nipputsinneqartarluni. Anaq silaannarlu naakkut anarfitsigooriarluni puussiamut katersuuttarpoq, taannalu ullormut arloriarluni pisariaqartitsinerluunniit malillugu imaarneqartarpoq taarserneqarluniluunniit. 

Nukinnik matusisartunik peqanngilaq taamaattumik silaannaq anarlu noqissinnaanngilatit.

Naakkut anarfik/ameraasaq misigissuseqanngilaq. Siullermik puussiat taarsernerani amikkut annialaarsinnaavutit sapaatilli akunneri arlallit qaangiuppata qaangiutissaaq.

Tipimik nipimillu ernumassuteqarnerit

Silaannaap aqqusaarnerani inaluit "nilernertut" nipiliortut ilaasa misigisarpaat. Ingammik sapaatit akunnerni siullerni naakkut anarfiup pullaqqalaarnerani. 

Inalukkami silaannaq puussiami aamarutissanik filterikkut aniasarpoq, taassuma tipeqartussaagaluartoq tipaarutsittarpaa.

Anap tikka puussiakkut aamma naaneqarsinnaanngilaq. Taamaallaat puussiap taarsernerani tipeqarsinnaavoq, soorlu perusuersartarfimmi anarnertut. 

Atisat

Nalinginnaasumik naakkut anarfik atisakkut takuneqarsinnaasanngilaq. Amerlanerit atisat atortakkatik atuinnartarpaat. Allat atisat asiilanerulaartut atortarpaat, ingammik naakkut anarfik naami nuisalaartumi inissisimagaangat.

Pisarnittut nerigit

Nerisavit allanngortinnissaannut oqaloqatigisimanngikkutsigit naakkut anarfeqarnermi nerisatit allanngortittariaqanngilatit. 

Timersorsinnaavutit nalullutillu

Pilatsereernermi pitsanngoreeruit ulluinnarni suliarisartakkatit isumageqqilersinnaavatit. Naakkut anarfeqarluni puussiallu timersorluni allatulluunniit timimik aalatitsinermi atugarineqarsinnaalluarput. Naluttarfimmi immamilu naloqqusaavutit.

Atoqateqaqqusaavutit

Naakkut anarfeqarlutit atoqateqaqqusaavutit. Pilatsinnerup kingorna qasuneq piumassuseqannginnerlu nalinginnaasuupput, piareersimasutullu misigisimalernissamut sivisusinnaavoq.

Naakkut anarfivit paarinissaanut ilitsersuutissavatsigit

Napparsimavimmiinninni ilitsersuutissavatsigit naakkut anarfiit qanoq paarissanerit qanorlu puussiartaa taarsissanerit. Amerlanerit angerlartinnatik nammineersinnaalertarput. 

Pilatsinnissaq sioqqullugu ulluinnarni assersuutigalugu eqqiluisaarnikkut ikiorteqarnissamik isumalluuteqarsimaguit naakkut anarfivit paarinissaanut ikiortariaqarsinnaavutit. Angerlartitsinnak tamanna pillugu oqaloqatigissavatsigit. 

Puussiat akeqanngillat. Angerlartinneqarnermi misissortinnermilu atortussanik (puussianik il.il.) angerlaassassannik tunissavatsigit. Kalaallit Nunaanni Nuummi naakkut anarfeqarnermut peqqissaasoq niviarsiaq atortut pisariaqartitatit pillugit attavigissavat.

Attavissat

Danmarkimiikkuit apeqqutissaqaruit naakkut anarfeqarnermut peqqissaasorput niviarsiaq attavigisinnaavat. 

Oqarasuaat: +45 38 63 62 24
Piffissaq sianerfissaq: ataasinngorneq-tallimanngorneq nal. 08.00-09.00.

Kalaallit Nunaanni Nuummi naakkut anarfeqarnermut peqqissaasoq niviarsiaq attavigisinnaavat.